Ólafur gat grætt á kaupunum

Embætti sérstaks saksóknara segir að ef kaup Sheikh Mohamed bin Khalifa Al Thani í Kaupþingi í september 2008 hefðu skilað hagnaði hefði Ólafur Ólafsson, þá einn stærsti eigandi bankans, hagnast á því.

Þetta er meðal þess sem kemur fram í ákæru embættisins þar sem Ólafur, Hreiðar Már Sigurðsson, fyrrverandi forstjóri Kaupþings, Sigurður Einarsson, fyrrverandi stjórnarformaður bankans, og Magnús Guðmundsson, fyrrum framkvæmdastjóri Kaupþings í Lúxemborg, eru ákærðir fyrir umboðssvik og markaðsmisnotkun eða hlutdeild í slíkum brotum.

Í ákærunni segir að „í september 2008 létu ákærðu starfsmenn Kaupþings og Kaupþings Lúxemborg setja upp viðskiptafléttu í kringum kaup á 5,01% hlut í Kaupþingi. Í fléttunni fólst að Kaupþing lánaði tveimur félögum, Gerland og Serval, samtals um 26 milljarða króna. Var Gerland í eigu ákærða Ólafs en Serval í eigu Sheikh Mohamed bin Khalifa Al Thani. Lánsfé því sem ákærðu, Hreiðar Már og Sigurður, létu veita til félaganna […] var sama dag veitt áfram til kýpverska félagsins Choice Stay Ltd."

Eigendur þess félags voru Sheikh Mohamed bin Khalifa Al Thani, Ólafur og Sheikh Sultan Al Thani, vinur Ólafs og ráðgjafi Sheikh Mohamed. Féð var síðan látið renna til Q Iceland Finance og hlutirnir í Kaupþingi keyptir í nafni þess félags.

Í ákærunni segir að svo „virðist sem hugsunin með fléttunni hafi verið sú að nær allur mögulegur hagnaður af viðskiptunum myndi flæða frá Q Iceland Finance til Choice Stay í gegnum hagnaðartengt lán (e. profit participation loan). Ef hagnaður hefði orðið af viðskiptunum með hlutabréfin hefðu það því verið eigendur Choice Stay[…]sem hefðu deilt honum með sér". Samkvæmt hagnaðartengda láninu áttu lánakjörin að „endurspegla gengi bréfa Kaupþings þannig að ef t.d. 100 krónu hagnaður hefði orðið á bréfunum hjá Q Iceland Finance hefðu 90-100 krónur farið til Choice Stay".

Ólafur neitaði því í yfirlýsingu í gær að einhver hagnaðarhlutdeild hefði átt að rata til hans. - þsj