Manchester United á markað

Viðskipti munu hefjast með hlutabréf í enska knattspyrnuliðinu Manchester United í Kauphöllinni í Bandaríkjunum í fyrsta sinn í dag.

Með því að skrá félagið á markað í Bandaríkjunum vilja eigendur þess safna 300 milljónum dala í nýtt hlutafé, eða 36 milljörðum króna.

Aðdáendur liðsins og sérfræðingar í markaðsviðskiptum hafa hins vegar miklar efasemdir um að þessi viðskipti verði til þess að bæta stöðu liðsins í ensku úrvalsdeildinni eða að fjárhagur þess muni batna, en félagið hefur barist við miklar skuldir frá því að hin bandaríska Glazer fjölskylda keypti liðið fyrir um sjö árum síðan.

Fyrirfram töldu aðilar sem sjá um söluna á hlutabréfunum sig geta fengið 16-20 dali á hlut sem myndi þýða að félagið væri tæplega þriggja milljarða dala virði, eða 360 milljarða króna. Í gærkvöld var hins vegar tilkynnt að hluturinn yrði líklegast ekki seldur á meira en fjórtán dali.

Manchester United er eitt allra þekktasta knattspyrnulið í heimi og nýtur meðal annars mikilla vinsælda í Asíu. Þekktustu leikmenn þess eru Wayne Rooney og Rio Ferdinand.