Nú er hægt að fá Chrome á iPhone

Tæknirisinn Gooogle tilkynnti fyrr í vikunni að Chrome netvafrinn yrði brátt fáanlegur fyrir iOS stýrikerfið. Það var síðan í gær sem að vafrinn vinsæli birtist í smáforrita safni Apple.

Google Chrome er einni vinsælasti vafri veraldar. Nýlegar netmælingar gefa til kynna að forritið sé hægt og bítandi að nálgast vinsældir Internet Explorer en hann hefur verið vinsælasti vafri veraldarvefjarins um árabil.

Chrome er nú fáanlegur á iPad spjaldtölvuna sem og iPhone. Innbyggður vafri iOS stýrikerfisins, Safari, hefur lengi vel verið eini valkostur notenda og því vakti það mikla athygli þegar Google tilkynnti um áætlanir sínar.

Mikið hefur verið fjallað um þennan vafra á tæknifréttasíðum. Þá fær Google mikið lof fyrir hönnun forritsins en það svipar mjög til hinnar hefðbundnu útgáfu Chrome.

Það varð þó fljótt ljóst að Chrome fyrir iOS myndi aldrei verða hraðari en Safari. Þau forrit sem fylgja stýrikerfinu eru sjálfgild í einu og öllu, þannig hefur hefur Chrome ekki aðgang að þeim eiginleikum stýrikerfisins sem Apple notaðist við þegar forrit þess voru hönnuð.

Það er þó ekki einungis hraði sem skiptir máli. Chrome fyrir iOS er beintengt Google reikning notandans og miðlar upplýsingum auðveldlega milli mismunandi tækja. Þannig flæðir vafrasaga, bókamerki og aðrar upplýsingar frá borðtölvunni yfir í snjallsímann.

Hægt er að finna Chrome í App store.