Írar flýja skuldir með hjálp breskra dómstóla

Breskur lögfræðingur gefur sig út fyrir að aðstoða yfirskuldsetta Íra við að losna úr fjötrum skuldbindinga sinna. Í breska blaðinu Guardian var í gær fjallað um lögfræðinginn Steve Thatcher, sem hefur að eigin sögn hjálpað um 55 Írum að afskrifa með hjálp breskra dómstóla ríflega 240 milljarða króna.

Aðferðin felst í því að skuldarinn afhendir lykla af öllum eignum og flytur tímabundið frá Írlandi til Bretlands. Þar fer hann fyrir dómstóla og fær sig lýstan gjaldþrota. Þá þarf hann að dvelja tæpt ár í Bretlandi en eftir það getur hann flutt aftur til Írlands laus við sínar skuldir og tekið aftur upp sitt fyrra líf.

Ástæðan sem gerir eftirsóknarvert að nota breska kerfið er sú að þrotamaður í Bretlandi getur ekki átt neinar eignir eða fjárhagslegar skuldbindingar í 1 ár, en samsvarandi tími er 12 ár á Írlandi. Með þennan mun í huga stofnaði lögfræðingurinn Steve Thatcher fyrirtækið www.irishbankruptcyuk.com.

Margar írskar fjölskyldur lentu illa í því eftir hrunið árið 2008. Þeir sem höfðu nýlega fjárfest í eignum horfðu gjarna upp á óviðráðanlegar skuldir. Í Guardian var rætt við nafnlaust par sem hafði notfært sér möguleika Steve Tatcher og fengið skuldir sínar afskrifaðar.

Þegar þau voru innt eftir svörum við því hvort úrræði þeirra gætu ekki fellt írska banka svöruðu þau að bönkunum hefði þegar verið bjargað af skattgreiðendum, Alþjóðagjaldeyrissjóðinum og Evrópusambandinu. „Þetta er okkar leið til að endurreisa líf okkar."