Krugman: Leiðtogar Evrópuríkja að gera gríðarleg efnahagsleg mistök

Paul Krugman, Nóbelsverðlaunahafi í hagfræði og pistlahöfundur hjá New York Times, segir að leiðtogar Evrópuríkja haldi áfram að gera gríðarleg efnhagsleg og pólitísk mistök, sem allur heimurinn muni gjalda fyrir á endanum. Þetta kemur fram í pistli Krugmans sem ber heitið Efnahagslegt sjálfsmorð Evrópu (European Economic Suicide).

Krugman segist hafa verið vongóður um að leiðtogar Evruríkjanna myndu læra af mistökum sínum, eftir að Evrópski seðlabankinn lánaði bönkuðum ríflega 1.000 milljarða evra, fyrst ríflega 530 milljarða evra í desember í fyrra og síðan afganginn eftir áramótin. Því miður hafi þeir ekki gert það.

Krugman segir ekkert benda til þess að leiðtogar Evrópuríkja hafi endurskoðað hvernig sé verið að taka á málum, þvert á móti sé gripið til aðgerða sem mun bara dýpka vandamálin frekar, einkum í ríkjum þar sem atvinnuleysi er hátt. Hraður og mikill niðurskurður ríkisútgjalda sé ekki lausn á vanda sem sé mun djúpstæðari og tengist því að evran vinni beinlínis gegn hagsmununum margra ríkja Evrópu.

Krugman lýkur pistli sínum á eftirfarandi orðum: "Leiðtogar Evrópuríkja virðast staðráðnir í því að keyra efnahagskerfi - og samfélögin - fram af hengibrún. og allur heimurinn mun líða fyrir það."

Sjá má pistil Krugmans hér.