Opna á viðskipti við íslensk fyrirtæki á ný

Stærsta greiðslutryggingafyrirtæki heims, Euler Hermes, hefur hafið viðskipti við íslensk fyrirtæki á ný. Fyrirtækið lokaði á viðskipti við íslensk fyrirtæki í kjölfar bankahrunsins.

Euler Hermes tilkynnti íslenska innflutningsfyrirtækinu Innnes þetta fyrir helgi en Innnes hefur allt frá hruni staðið fyrir reglulegri upplýsingagjöf til Euler Hermes um stöðuna á Íslandi.

„Ég efast um að margir átti sig á því hvað þetta er örugglega búið að valda mörgum fyrirtækjum á Íslandi miklum erfiðleikum,“ segir Haraldur Jónsson, forstjóri Innnes, og bætir við: „Nokkrir af mínum birgjum fara með öll sín viðskipti í gegnum Euler Hermes og frá 2008 höfum við þurft að greiða þessum birgjum annaðhvort með staðgreiðslu eða þá hafa bankaábyrgð á greiðslunum. Þetta hefur kostað okkur talsverða fjármuni.“

Innnes hefur nú endurheimt sömu greiðslufresti og það hafði fyrir hrun en fyrirtækið skiptir við um 100 erlenda birgja um allan heim. Haraldur bætir þó við að margir þeirra hafi sýnt stöðu Innnes skilning eftir að bankahrunið varð og ekki breytt kjörum fyrirtækisins. Þá segir hann að þrátt fyrir að Innnes hafi nú hafið viðskipti við Euler Hermes á ný sé ekki sjálfgefið að fyrirtækið hefji aftur viðskipti við öll önnur íslensk fyrirtæki.

Tvö önnur greiðslutryggingafyrirtæki, Astradius og Coface, hafa átt í takmörkuðum viðskiptum við íslensk fyrirtæki síðustu misseri. Euler Hermes er hins vegar stærst á þessu sviði og margir erlendir birgjar eru aðeins með tryggingasamninga við Euler Hermes. Ákvörðun Euler Hermes hefur því mikla þýðingu fyrir fyrirtæki á borð við Innnes.- mþl