Kort af leið ræningjanna - Þaul­skipu­lagðir á þremur bílum

Lögreglan leitar enn þriggja manna sem frömdu vopnað rán í verslun Michelsen úrsmiða á ellefta tímanum í gærmorgun. Ræningjarnir ógnuðu starfsfólki í versluninni með byssum og komust undan með talsvert af dýrum armbandsúrum.

Mennirnir komu inn í verslunina skömmu eftir opnun. Þeir ógnuðu starfsfólkinu með byssum og skipuðu því á ensku að leggjast á gólfið.

Frank Michelsen úrsmiður var staddur í versluninni í gærmorgun ásamt syni sínum og konu sem starfar í búðinni. Hann telur víst að hleypt hafi verið af einhvers konar skoti inni í búðinni á meðan starfsfólkið lá á gólfinu. Frank telur að það hafi verið gert til að ógna þeim enn frekar. Starfsfólk í nálægum verslunum sagðist í samtali við Fréttablaðið einnig hafa talið sig hafa heyrt skothvelli. Tvær byssur hafa fundist og reyndust báðar vera eftirlíkingar. Lögregla hefur hins vegar ekki viljað gefa fjölmiðlum neinar frekari upplýsingar um ránið.

Mennirnir brutu upp skápa með bareflum og tóku aðeins armbandsúr frá Rolex, Tudor og Michelsen. Úrin kosta allt að eina og hálfa milljón hvert. Að sögn Franks tóku mennirnir öll þau Rolex-úr sem þeir náðu í. Tjónið er því mikið, þótt hann vilji ekki nefna neina upphæð. „Svo er tjónið sem verður þegar glerið hrynur ofan á aðrar vörur."

Mennirnir huldu andlit sín að sögn Franks. Hann segir þá hafa verið með einhvers konar klúta upp að augum og með húfur og hettur til að hylja efri hluta andlitsins. Að loknu ráninu, sem tók aðeins um mínútu að mati Franks, hlupu mennirnir upp á Vegamótastíg og óku í burtu. Frank sagði ránið augljóslega hafa verið þaulskipulagt. „Það er alveg ljóst að þetta var ekki ákveðið yfir kaffibolla," segir hann.

Samkvæmt heimildum Fréttablaðsins eru ræningjarnir taldir hafa notað að minnsta kosti þrjá stolna bíla í tengslum við ránið. Að sögn Franks var Audi-bílnum lagt á Vegamótastíg, rétt hjá versluninni, á sunnudagskvöld eða -nótt. Þann bíl notuðu ræningjarnir svo til að komast burt af ránsstaðnum og að Smáragötu þar sem hann fannst skömmu síðar. Annar bíll, silfraður Volkswagen Passat, fannst í gangi á Vegamótastíg skömmu eftir ránið. Líklegt er að hann hafi verið notaður til að koma ræningjunum á staðinn í gærmorgun. Þriðji bíllinn er ófundinn eftir þeim upplýsingum sem Fréttablaðið hefur.

Lögreglan fékk allar myndbandsupptökur úr versluninni í gær en ránið náðist allt á öryggismyndavélar. Frank segir mikilvægast að allir séu heilir á húfi og ekki sé endilega aðalatriði að úrin finnist, „heldur að þetta geti ekki viðgengist á Íslandi, að svona rán séu framin hér á okkar friðsæla landi – sem hefur verið".

thorunn@frettabladid.is