Helena skoraði fimm stig

Helena Sverrisdóttir skoraði fimm stig fyrir lið sitt, Good Angels Kosice frá Slóvakíu, þegar að liðið tapaði fyrir Wisla Can-Pack í Evrópudeild kvenna í kvöld, 72-69.

Staðan í hálfleik var 41-38, gestunum frá Póllandi í vil. Þeir skoruðu svo 22 stig í þriðja leikhluta sem fór langt með að tryggja liðinu sigur í leiknum.

Helena lék alls í þrettán mínútur og nýtti tvö af fjórum skotum sínum. Hún tók tvö fráköst, gaf eina stoðsendingu og stal boltanum einu sinni.

Good Angels er í fjórða sæti C-riðils með tólf stig eftir átta leiki. Spartak Moskva og Wisla deila efsta sætinu með fjórtán stig hvort.