Ítalir greiða himinháa vexti

Ítalir voru neyddir til þess að greiða himinháavexti vegna 10 milljarða evra skuldabréfaflokks sem landið þarf að endurfjármagna. Vaxtaálagið er ríflega 6,5% að sögn breska ríkisútvarpsins BBC sem teljast arfaslök vaxtakjör miðað við opinberar skuldbindingar. Ástæðan er fyrst og fremst sú að vaxtaálag á skuldir landsins á markaði, eru í hæstu hæðum, eða nálægt sjö prósentustigum.

Vonir standa til þess að endurfjármögnun verði ódýrari fyrir landið þegar björgunarsjóður ESB hefur verið virkjaður. Þegar hefur verið samþykkt að stækka hann úr 440 milljörðum evra í 1.000 milljarða evra, en sjóðinn á meðal annars að nýta til þess að endurfjármagna skuldir þjóða sem glíma við miklar skuldir og hátt vaxtaálag.

Forsætisráðherra Ítalíu Mario Monti hélt í dag til fundar við embættismenn ESB þar sem skuldavandi Ítalíu er til umræðu. Ítalía er þriðja stærsta evruhagkerfið, á eftir því þýska og franska.