Sigfús og Orri Freyr kallaðir inn í pressuliðið

Ægir Hrafn Jónsson, leikmaður Fram, hefur verið kallaður yfir í landslið karla fyrir leikinn gegn Úrvalsliði HSÍ í kvöld. Sigfús Sigurðsson, leikmaður Vals, verið kallaður inn í Úrvalsliðið í hans stað.

Sigfús er margreyndur landsliðsmaður og sagði Guðmundur Guðmundsson, landsliðsþjálfari, við Fréttablaðið á dögunum að Sigfús ætti möguleika á að fara með liðinu á EM í Serbíu á næsta ári, verði hann í góðu formi.

Þá hefur Ólafur Gústafsson neyðst til að draga sig úr Úrvalsliðinu í kvöld vegna meiðsla og hefur Orri Freyr Gíslason, einnig hjá Val, verið kallaður inn í liðið í hans stað.