Lánamarkaðir svo gott sem lokaðir fyrir Ítalíu

Álag á tíu ára ríkisskuldabréf Ítalíu náði nú skömmu fyrir hádegi hæsta gildi sem það hefur mælst í á þessu ári. Álagið er nú 6,64%. Þetta þýðir að fjármagnskostnaður landsins er það hár að nær ómögulegt er fyrir landi að endurfjármagna skuldir sínar en áhyggjur af fjárhagsvanda Ítalíu hafa farið vaxandi undanfarna daga.

Vandi Ítalíu er mun stærra vandamál fyrir evrusvæðið heldur en vandi Grikklands. Gríska hagkerfið er aðeins 2% af evruhagkerfinu, eða litlu minna en nemur hagkerfinu í Katalóníu innan Spánar.  Ítalía er hins vegar þriðja stærsta hagkerfið á evrusvæðinu, á eftir því franska og þýska.

Það er þrennt sem veldur áhyggjur, af því er fram kemur á vefsíðu breska ríkisútvarpsins BBC. Miklar ríkisskuldir, veikburða fjármálastofnanir og pólitísk óvissa. Alþjóðagjaldeyrissjóðurinn hefur þegar tekið stöðu Ítalíu til skoðunar og fól leiðtogafundur 20 stærstu iðnríkja heims, G20, sjóðnum að vera eins konar yfirboðvald landsins. Almennt er álitið að Silvio Berlusconi, forsætisráðherra, sé búinn að missa pólitísk tök á efnahagsmálum landsins en hann freistar þess nú að þétta raðirnar í ríkisstjórn sinni með það fyrir augum að koma í veg fyrir efnahagsvandi landsins magnist.