Berlusconi berst fyrir pólitísku lífi sínu

Silvio Berlusconi, forsætisráðherra Ítalíu, berst nú fyrir pólitísku lífi sínu en aðgerðir ríkisstjórnar hans í ríkisfjármálum verða bornar undir þingið í landinu seinna í dag. Fulltrúar ríkisstjórnar Berlusconis funduðu með stjórnarandstöðunni í ellefu tíma í gær, með það fyrir augum að afla trausts hennar fyrir atkvæðagreiðsluna í þinginu.

Í fréttaskýringu á vefsíðu Wall Street Journal kemur fram að það séu helst alþjóðlegir fjárfestar sem nú setji pressu á Berlusconi. Vaxtakjör sem landinu bjóðast nú eru þau verstu í sögunni. Áhættuálag á tíu ára ríkisskuldabréf landsins er nú yfir 6,7% sem þýðir í reynd að landið getur ekki endurfjármagnað skuldir sínar. Sem er eitthvað sem landið þarf nauðsynlega á að halda.

Aðgerðirnar í ríkisfjármálum eru forsenda þess að Evrópski Seðlabankinn kaupi skuldabréf landsins og bjóði landinu upp á lánakjör sem það ræður við, að því er þjóðarleiðtogar Evrópu hafa samþykkt.