Credit Suisse undir eftirliti bandarískra yfirvalda

Bandarísk yfirvöld eru enn að berjast gegn því að svissneskir bankar aðstoði ríka Bandaríkjamenn við að skjóta peningum undan skatti. Nú síðast hefur svissneski risabankinn Credit Suisse sent viðskiptavinum sínum bréf og tilkynnt um að bankinn þurfi að gefa yfirvöldum nákvæmar upplýsingar um reikningsupphæðir og fleira.

Þetta kemur fram í frétt á vefsíðu breska ríkisútvarpsins BBC.

Í bréfi Credit Suisse segir að viðskiptavinir geti annað hvort samþykkt að gögn um fjármál þeirra verði afhent yfirvöldum eða mótmælt formlega með kæru.

Bandarísk yfirvöld hafa allt frá því á haustdögum 2008 reynt að fá ítarlegar upplýsingar um svissneskum bönkum með það fyrir augum að upplýsa um hvort bankarnir hafi kerfisbundið hjálpað viðskiptum sínum að skjóta peningum undan skatti.

Svissneski bankinn UBS hefur þegar samþykkt að greiða 780 milljóna dollara sekt, jafnvirði  100 milljarða króna, vegna skattsvika viðskiptavina bankans sem hann var talinn hafa aðstoðað við að framkvæma.