Staðan á mörkuðum gæti tafið sölu Iceland Foods

Staðan sem upp er komin á fjármálamörkuðum víða um heim gæti haft þær afleiðingar að salan á verslunarkeðjunni Iceland Foods tefjist fram yfir áramótin.

Þetta kemur fram í ítarlegri umfjöllun á Reuters um málið. Þar segir að fjármögnunarmarkaðir heimsins séu við frostmarkið vegna þeirrar óvissu sem ríkir um lausn skuldakreppunnar í Evrópu. Hið sama gildir raunar um millibankamarkaðinn en bankar, einkum í Evrópu, safna nú lausafé í gríð og erg til að mæta væntanlegum afskriftum sínum á lánum til Grikklands.

„Óstarfhæfir fjármögnunarmarkaðir ógna nú nýjum fjárfestingum eins og 1,5 milljarða punda sölunni á Iceland,“ segir á Reuters en fyrstu kauptilboðin í Iceland voru opnuð í síðustu viku.

Fram kemur að fjármagnsmarkaðurinn fyrir skuldsettar yfirtökur í Evrópu sé algerlega lokaður í augnablikinu. Bankar séu ekki viljugir til að lána meira fé í slíkar yfirtökur og fjárfestingarsjóðir séu ekki viljugir til að borga aukna vexti af slíkum lánum.

Á Reuters segir að bankamenn telji að rekstur Iceland Foods geti staðið undir um 600 milljón punda skuldsetningu. Hinsvegar muni lán fyrir slíkri skuldsetningu ekki fást fyrr en staðan á fjármálamörkuðunum breytist til hins betra.