Steve Jobs var lagður í einelti og reyndi megrunarkúra á unglingsaldri

Ævisaga Steve Jobs, hugmyndafræðings og forstjóra Apple, kom út í dag, en þar kemur meðal annars fram að Jobs hafi verið lagður í einelti í skóla, reynt ýmsa megrunakúra á unglingsaldri og hagað sér undarlega í samskiptum við annað fólk - meðal annars með því að stara á fólk án þess að blikka augunum.

Höfundur bókarinnar, Walter Isaacson, var í viðtali við fréttaskýringaþáttinn 60 mínútur í gærkvöldi þar sem hann sagði að Jobs hefði mögulega verið versti stjórnandi í heimi. Hann hafi verið sólgin í rifrildi, sem hrakti marga samstarfsmenn hans í burtu, og hann hafi á stundum verið beinlínis grimmur við fólk.

Bókin virðist vera afar hispurslaus um líf Jobs sem sjálfur vandar ekki samferðamönnum sínum kveðjurnar. Þannig segir Jobs um Bill Gates, forstjóra Microsoft, að hann hafi ekki fengið eina frumlega hugmynd á ævi sinni - hann hefði einfaldlega stolið hugmyndum annarra.

Þá sagði Jobs um kollega sinn að hann hefði  verið víðsýnni maður ef hann hefði droppað sýru á yngri árum eða heimsótt klaustur í Indlandi.

Eins og flestir vita lést Jobs 5. október aðeins 56 ára að aldri.