A-landslið kvenna í handbolta lagði af stað í morgun til Póllands þar sem liðið tekur þátt í æfingamóti um helgina. Ágúst Þór Jóhannsson landsliðsþjálfari þurfti að gera breytingu á hópnum sínum áður en lagt var af stað.
Rut Jónsdóttir þurfti að draga sig út úr hópnum vegna meiðsla sem hún varð fyrir um helgina í leik með danska liðinu Team Tvis Holstebro og í hennar stað var valin Solveig Lára Kjærnested, leikmaður Stjörnunnar.
Línumaðurinn Anna Úrsúla Guðmundsdóttir, leikmaður Vals, fór heldur ekki með liðinu í morgun vegna veikinda en samkvæmt frétt á HSÍ þá er vonast til að hún geti farið utan síðar í vikunni.
Íslenska liðið leikur við Holland, Pólland og Tékkland á æfingamótinu sem fer fram í borginni Chorzow í suður Póllandi.
Íslensku stelpurnar eru að hefja undirbúning sinn fyrir undankeppni EM sem hefst í október sem og heimsmeistaramótið í Brasilíu sem fer fram í desember.
Íslenski landsliðshópurinn:
Markverðir:
Guðný Jenny Ásmundsdóttir, Valur
Guðrún Ósk Maríasdóttir, Fram
Aðrir leikmenn:
Anna Úrsúla Guðmundsdóttir, Valur
Arna Sif Pálsdóttir, Aalborg DH
Ásta Birna Gunnarsdóttir, Fram
Birna Berg Haraldsdóttir, Fram
Brynja Magnúsdóttir, HK
Dagný Skúladóttir, Valur
Hanna Guðrún Stefánsdóttir, Stjarnan
Hrafnhildur Ósk Skúladóttir, Valur
Karen Knútsdóttir, HSG Blomberg-Lippe
Ragnhildur Rósa Guðmundsdóttir, Valur
Rakel Dögg Bragadóttir, fyrirliði, Levanger HK
Solveig Lára Kjærnested, Stjarnan
Stella Sigurðardóttir, Fram
Þórey Rósa Stefánsdóttir, Team Tvis Holstebro
Þorgerður Anna Atladóttir, Valur
Leikir íslenska liðsins í Póllandi eru:
Föstudagur 23.sept kl.15.30 Ísland – Holland
Laugardagur 24.sept kl.17.30 Ísland – Pólland
Sunnudagur 25.sept kl.09.00 Ísland – Tékkland
(Tímasetningar eru að íslenskum tíma)
Rut missir af Póllandsferðinni - Anna Úrsúla veik
