Afturelding vann nauman sigur á Víkingi

Tveir leikir fóru fram í Reykjavíkurmóti karla í kvöld. Afturelding vann nauman sigur á Víkingum en Framarar lentu ekki í teljandi vandræðum með ÍR.

Fram vann tólf marka sigur, 34-22, í Austurbergi í kvöld. Jóhann K. Reynisson skoraði átta mörk fyrir Fram, Einar Rafn Eiðsson sex og Ingimundur Ingimundarson fimm gegn uppeldisfélagi sínu.

Guðni Kristinsson var markahæstur hjá Breiðhyltingum með sex mörk.

Mosfellingar voru með fjögurra marka forystu gegn Víkingi í hálfleik, 13-9, í kvöld en unnu að lokum eins marks sigur, 24-23.

Einar Héðinsson skoraði sex mörk fyrir Aftureldingu en hjá Víkingum var Gunnar Valur Arason markahæstur með fimm mörk.