Ingi Þór: Vorum bara ekki tilbúnir að mæta baráttunni hjá þeim

„Við vorum bara hræðilega lélegir. Leikurinn var spilaður mjög fast og fékk að fljóta þannig og við létum þá bara lemja okkur niður. Við vorum bara ekki tilbúnir að mæta baráttunni hjá þeim í kvöld," sagði Ingi Þór Steinþórsson, þjálfari Snæfells, eftir 69-64 tap liðs síns gegn Fjölni í Iceland Express deild karla í kvöld en þetta var fyrsta tap Snæfells á árinu 2010.

„Við erum nýkomnir úr tveimur spennandi leikjum gegn Keflavík og hugsanlega var eitthvað smá spennufall en það úrskýrir ekki fyllilega slakan leik okkar í kvöld. Lykilmenn voru bara að klikka hjá okkur og það er vissulega slæmt því svona töp eru mjög dýr ef maður ætlar að vera með í toppbaráttunni," sagði Ingi Þór svekktur.

Snæfell var búið að vinna síðustu sex leiki sína fyrir leikinn gegn Fjölni, fjóra í deild og tvo í bikar, en liðið fann sig engan veginn gegn baráttuglöðum Fjölnismönnum í íþróttahúsinu Dalhúsum í kvöld.