Eyrir samdi við lánardrottna

Fjárfestingarfélagið Eyrir Invest hagnaðist um 3,2 milljónir evra, jafnvirði um 490 milljóna króna, á fyrstu sex mánuðum ársins samanborið við 11,5 milljónir evra á sama tíma í fyrra. Neikvæður gengismunur og beiting hlutdeildaraðferðar á eignir félagsins hafa áhrif á samanburðinn.

Eignir Eyris námu 417 milljónum evra, 64 milljörðum króna í lok tímabilsins og nam eigið fé 160 milljónum evra. Eiginfjárhlutfall stóð í 38 prósentum.

Á móti námu skuldir 257 milljónum evra, jafnvirði fjörutíu milljarða króna, Þungi afborgana fellur á næstu þremur árum, þar af 124,5 milljónir evra, nítján milljarðar króna, á næsta ári, miðað við hálfsársuppgjör sem birt var á mánudag.

Stjórnendur Eyris benda á í samtali við Fréttablaðið að staðan sé sterk. Gjalddagarnir komu til við endurfjármögnun félagsins í fyrravor þegar skuldir voru stokkaðar upp í samvinnu við lánardrottna. Gert er ráð fyrir að lengt verði í lánum fyrir gjalddaga.

Afborganir á næsta ári verði mun lægri en fram komi í uppgjörinu, í hæsta lagi nærri tuttugu milljónum evra, jafnvirði þriggja milljarða króna, í stað nítján. - jab