Ólafur: Nýttum fríið betur en þeir

Bronsmaðurinn Ólafur Guðmundsson var í strangri gæslu hjá Akureyringum í kvöld en náði þó að skora fimm mörk og öll úr hröðum upphlaupum er Akureyringar náðu ekki að taka hann úr umferð.

„Það leit kannski út fyrir að vera létt en við þurftum að hafa fyrir þessu. Bæði í undirbúningnum sem og í leiknum sjálfum," sagði Ólafur við Vísi eftir sigur FH í kvöld.

„Við börðumst allan tímann og lögðum okkur alla fram og það skilaði sigrinum. Pásan virðist ekki hafa farið jafn vel í þá og okkur. Það er spurning hvernig menn nýta tímann og mér sýndist við hafa notað hann betur og mættum klárir í slaginn.

„Við teljum okkur eiga nóg inni og vorum ekki að spila eins vel og við teljum okkur geta fyrir áramót. Þetta var betra en það er mikil vinna fram undan hjá okkur."