Jafntefli hjá ensku liðunum en stórsigrar hjá þeim spænsku

Fyrstu átta leikirnir í riðlakeppni Meistaradeildar Evrópu fóru fram í kvöld. Bæði ensku liðin sem voru í eldlínunni í kvöld gerðu jafntefli.

Manchester United og Rangers gerðu markalaust jafntefli á Old Trafford í C-riðli en fyrir leikinn gerði Alex Ferguson tíu breytingar á byrjunarliði United frá síðasta leik.

Leikurinn var afar tíðindalitill og verður helst minnst fyrir þau slæmu meiðsli sem Antonio Valencia varð fyrir í síðari hálfleik. Bera þurfti Valencia af velli sem hefur líklegast ökklabrotnað.

Tottenham komst í 2-0 gegn Werder Bremen í Þýskalandi strax í fyrri hálfleik en mátti sætta sig við jafntefli. Peter Crouch skoraði síðara mark Tottenham en það fyrra var sjálfsmark Petri Pasanen.

Hugo Almeida minnkaði muninn fyrir Bremen rétt fyrir lok fyrri hálfleiks og Marco Marin jafnaði metin í upphafi þess síðari.

Spænsku liðin Valencia og Barcelona unnu stórsigra í sínum leikjum í kvöld. Valencia vann Bursaspor í Tyrklandi og Börsungar kjöldrógu Panathinaikos á heimavelli, 5-1. Lionel Messi skoraði tvö mörk fyrir Barcelona.

Titilvörn Inter hófst ekki á góðum nótum en liðið gerði jafntefli við Twente á útivelli, 2-2. Diego Milito, sem skoraði bæði mörk Inter í sigrinum á Bayern München í úrslitaleik Meistaradeildarinnar í vor, skoraði sjálfsmark í kvöld.

Sölvi Geir Ottesen spilaði allan leikinn fyrir FC Kaupmannahöfn sem vann 1-0 sigur á Rubin Kazan á Parken í kvöld.

Hér eru úrslit og markaskorarar kvöldsins:

A-riðill:

Werder Bremen - Tottenham 2-2

0-1 Petri Pasanen, sjálfsmark (12.)

0-2 Peter Crouch (18.)

1-2 Hugo Almeida (43.)

2-2 Marco Marin (47.)

Twente - Inter 2-2

0-1 Wesley Sneijder (14.)

1-1 Theo Janssen (20.)

2-1 Diego Milito, sjálfsmark (30.)

2-2 Samuel Eto'o (41.)

B-riðill:

Lyon - Schalke 1-0

1-0 Michel Bastos (21.).

Benfica - Hapoel Tel-Aviv 2-0

1-0 Luisao (21.)

2-0 Oscar Cardozo (68.)

C-riðill:

Manchester United - Glasgow Rangers 0-0

Bursaspor - Valencia 0-4

0-1 Ricardo Costa (16.)

0-2 Ricardo Vosta (41.)

0-3 Pablo (68.)

0-4 Roberto Soldado (76.)

D-riðill:

FC Kaupmannahöfn - Rubin Kazan 1-0

1-0 Dame N'Doye (87.)

Barcelona - Panathinaikos 5-1

0-1 Sidney Govou (20.)

1-1 Lionel Messi (22.)

2-1 David Villa (33.)

3-1 Lionel Messi (45.)

4-1 Pedro (78.).

5-1 Dani Alves (90.)