Umfjöllun: Birkir Ívar vann þessa lotu

Engu líkara var en að markverðirnir Birkir Ívar Guðmundsson, Haukum og Sveinbjörn Pétursson, HK, háðu einvígi þegar liðin mættust í úrslitakeppni N1-deildar karla í kvöld.

Báðir markverðir sýndu frábæra takta en að lokum stóðu Birkir Ívar og hans menn eftir sem sigurvegarar. Haukar unnu, 22-20, eftir æsispennandi lokamínútur.

Gestirnir úr Kópavogi byrjuðu miklu betur og Haukarnir virtust eiga í miklum vandræðum með öfluga 6-0 vörn HK-inga. Að sama skapi gekk HK ágætlega að leysa 3-2-1 vörn Haukanna.

HK komst í 6-3 en þá snerist leikurinn við. HK skoraði aðeins tvö mörk á síðustu fimmtán mínútum fyrri hálfleiks og bæði úr vítaköstum. Reyndar var vítanýting beggja liða sorglega léleg í kvöld - alls voru sex af sextán vítaköstum nýtt.

Birkir Ívar varði alls fimm víti í kvöld og Sveinbjörn þrjú.

Haukar náðu því frumkvæðinu og héldu því þar til rúmar þrjár mínútur voru eftir. Þá náði HK að jafna metin en Haukar skoruðu þrjú af síðustu fjórum mörkum leiksins og gátu því fagnað góðum sigri.

Sóknarleikur beggja liða var betri í seinni hálfleik en sem fyrr segir komu markverðirnir í veg fyrir að ekki voru fleiri mörk skoruð en raun bar vitni. Haukar voru þó grimmari á boltann og duglegri að sækja fráköstin og nýta þau. Einnig skipti miklu að HK misnotaði alls sex víti í leiknum og munar um minna í leik sem þessum.

Varnarleikurinn var að sama skapi mjög góður hjá báðum liðum allan leikinn og nutu markverðrnir vissulega góðs af því. Með smá heppni hefðu gestirnir vel getað náð sér alla vega í framlengingu og vilja þeir sjálfsagt hefna fyrir það þegar liðin mætast í Digranesinu á laugardaginn.

Haukar - HK 22 - 20 (10-8)

Mörk Hauka (skot): Sigurbergur Sveinsson 7/1 (16/2), Björgvin Hólmgeirsson 4 (10), Pétur Pálsson 3 (5), Freyr Brynjarsson 3 (5), Elías Már Halldórsson 3 (4), Einar Örn Jónsson 1 (2), Gunnar Berg Viktorsson 1/1 (3/3), Guðmundur Árni Ólafsson (1/1), Gísli Jón Þórisson (4).

Varin skot: Birkir Ívar Guðmundsson 20/5 (39/8, 51%), Aron Rafn Eðvarðsson 0 (1/1).

Hraðaupphlaup: 2 (Freyr 1, Sigurbergur 1).

Fiskuð víti: 6 (Freyr 3, Pétur 2, Björgvin 1).

Utan vallar: 4 mínútur.

Mörk HK (skot): Bjarki Már Elísson (2/1), Ragnar Hjaltested (1/1), Valdimar Þórsson 5/3 (10/5), Atli Ævar Ingólfsson 3 (6/1), Sverrir Hermannsson 3 (5), Hákon Bridde 3 (4), Bjarki Már Gunnarsson 3 (3), Ólafur Víðir Ólafsson 1/1 (5/2), Vilhelm Gauti Bergsveinsson 1 (3), Atli Karl Bachmann 1 (1).

Varin skot: Sveinbjörn Pétursson 21/3 (43/5, 49%).

Hraðaupphlaup: 6 (Bjarki Már 2, Valdimar 2, Hákon 1, Vilhelm Gauti 1).

Fiskuð víti: 10 (Atli Ævar 3, Ragnar 2, Sverrir 2, Bjarki Már 1, Hákon 1, Atli Karl 1).

Utan vallar: 4 mínútur.

Dómarar: Anton Gylfi Pálsson og Hlynur Leifsson. Höfðu góð tök á leiknum.