Ólafur: Ætlum að vinna þá á morgun

„Þetta var mjög jákvæður leikur. Það var mikilvægt að ná muninum í fimm mörk fyrir hlé. Svo héldum við áfram að mjatla í síðari hálfleik," sagði Ólafur Stefánsson landsliðsfyrirliði eftir jafnteflisleikinn gegn Frökkum í Höllinni í kvöld.

„Það má kannski segja varðandi þá að þeir skiptu um markvörð og hinn hefði hugsanlega varið meira. Samt ekki því þeir eru nánast með 110 kg í menn í hverri stöðu og hreyfanlegri mann fyrir utan hægra megin. Þetta er því alltaf hörkulið og við erum mjög glaðir með hafa tekið jafntefli út úr þessum leik.

„Þetta var jákvætt skref í rétta átt og við lærum af því að spila við þá í hvert skipti. Rétt eins og gegn Spáni fyrir Ólympíuleikana. Þá spiluðum við fimm sinnum við þá og töpuðum fjórum sinnum. Lærðum samt af leikjunum og það skilaði sér í Peking. Því fleiri leiki sem við fáum gegn Frökkum því betra," sagði Ólafur sposkur en hann átti stórleik í kvöld og vonast til þess að geta spilað álíka mikið í leiknum á morgun.

„Ég er í góðu formi og var svo að prófa nýja skó í kvöld, Asics. Þeir virkuðu mjög vel á mig," sagði Ólafur og tók fram að hann væri ekkert að auglýsa nýja samning. „Ég hef aldrei viljað gera skósamning heldur prófa það sem ég vill hverju sinni."

Liðin mætast að nýju í Höllinni á morgun klukkan 16.00 og Ólafur segir að liðið ætli að reyna að gera enn betur þá.

„Við ætlum að reyna að vinna þá á morgun. Þeir spila kannski með annað lið því þetta eru svolitlir kóngar. Sjáum hvað setur," sagði Ólafur og glotti.