Stjarnan rétt marði ÍR

Stjarnan vann ÍR í tvíframlengdum leik, 28-27, í oddaleik liðanna í undanúrslitum umspilskeppninnar um eitt laus sæti í N1-deild karla á næstu leiktíð.

Stjarnan varð í sjöunda sæti N1-deildar karla en ÍR í fjórða sæti 1. deildarinnar. Afturelding var þegar komið í úrslit umspilsins eftir sigur á Selfossi en þessi lið urðu í öðru og þriðja sæti 1. deildarinnar.

Stjarnan vann sem fyrr segir nauman sigur. ÍR átti boltann í síðustu sókn leiksins og í henni missti Stjarnan tvo menn af velli vegna tveggja mínútna brottvísunnar. ÍR átti síðasta skot leiksins en það hafnaði í vörn Stjörnunnar. Þar við sat.

Staðan í hálfleik var 11-10, ÍR í vil, en 22-22 að loknum venjulegum leiktíma. Staðan var svo enn jöfn, 26-26, eftir fyrri framlenginguna.

Ragnar Helgason skoraði sjö mörk fyrir Stjörnuna og Vilhjálmur Halldórsson sex. Hjá ÍR var Andri Friðriksson markahæstur með átta mörk en næstur kom Sigurjón Björnsson með fimm.