Ólafur: Eigum heima í toppsætunum

„Ég er mjög sáttur því þetta var leikur um annað sætið, gríðarlega mikilvægt. Við erum búnir að vera spila upp og niður en við þurftum bara að koma hingað í dag og sanna fyrir okkar fólki að við eigum heima í toppsætunum," sagði FH-ingurinn Ólafur Guðmundsson eftir sigur gegn Val í N1-deild karla í dag.

Ólafur var ánægður með liðið og fannst jákvætt að liðið kláraði leikinn með skynsemi og vill meina að það hafi verið lykillinn að sigri FH í dag.

„Ég var ánægður með varnarleikinn og markvörsluna. Við vorum líka skynsamir í restina og það var mjög gott. Við höfum lent í stressi í lokin og reynsluleysi talað til sín en það var annað upp á bátnum í dag. Við erum búnir að vera fara mikið yfir þetta síðustu daga og þegar á reyndi þá spiluðum við yfirvegað og það skilaði sigrinum hér í dag," sagði Ólafur sáttur eftir leik.