Haukar urðu deildarmeistarar

Haukar eru deildarmeistarar í N1-deild karla í handbolta eftir jafntefli við HK á heimavelli í dag. Haukar eru með 31 stig og Valur 29 en vegna innbyrðis viðureigna getur Valur ekki náð Haukum þrátt fyrir að ein umferð sé eftir.

Leikur Hauka og HK endaði 27-27, Valur vann Akureyri 26-24, Fram vann FH 30-26 og Stjarnan vann Víking 28-32.

Leikur Hauka og HK var kaflaskiptur til að byrja með. Haukar komust í 6-2 áður en HK vaknaði og skoraði sex mörk í röð. HK komst síðan í 15-11 en Haukar komust yfir í 17-16 áður en HK skoraði síðasta mark hálfleiksins. Staðan 17-17 í leikhléi.

Síðari hálfleikur var jafn og spennandi en það var lítið skorað. Haukar voru tveimur mörkum yfir þegar skammt var eftir en HK náði að jafna. Haukar höfðu boltann þegar hálf mínúta var eftir, tóku leikhlé, og reyndu ekki einu sinni að skora, heldur létu tímann bara renna út.



Þeir urðu þar með deildarmeistarar en Valur, sem vann Akureyri, er í öðru sæti. Sigurbergur Sveinsson skoraði átta mörk fyrir Hauka,  Andri Stefan sjö og Kári Kristján Kristjánsson sex. Valdimar Fannar Þórsson skoraði níu mörk fyrir HK, Gunnar Steinn Jónsson fimm og Ragnar Hjaltested fjögur.

Valsmenn þurftu að hafa mikið fyrir sigrinum á baráttuglöðum Akureyringum. Akureyri var 11-12 yfir í hálfleik og náði mest fjögurra marka forystu, 13-17. Valur jafnaði þó leikinn sem var í járnum allt til enda.

Akureyringar voru skrefinu á undan en Valsmenn náðu jafn harðan að jafna og komust yfir með marki úr víti þegar ein og hálf mínúta lifði af leiknum. Akureyri náði ekki að skora og Valsmenn tryggðu sér 26-24 sigur með síðasta markinu um leið og flautan gall.

Valsmenn lenda í öðru sæti deildarinnar en Akureyringar eru komnir með bakið upp við vegg. Þeir fá Fram í heimsókn í lokaumferðinni um næstu helgi en Stjarnan mætir Haukum. Ef Stjarnan vinnur og Akureyri tapar hafa liðin sætaskipti og Akureyri þarf að fara í aukaleiki um laust sæti í deildinni þar sem Stjarnan vann Víking í dag.

Staðan í deildinni fyrir lokaumferðina:

1. Haukar - 31 stig

2. Valur - 29 stig

3. HK - 23 stig

4. Fram - 23 stig

5. FH - 18 stig

6. Akureyri - 16 stig

7. Stjarnan - 15 stig

8. Víkingur - 5 stig



Lokaumferðin, sunnudaginn 5. apríl:

Akureyri - Fram

HK - Valur

Stjarnan - Haukar

FH - Víkingur