Páll Kolbeinsson ráðinn þjálfari Íslandsmeistara KR í körfubolta

Fyrrum landsliðsmaðurinn Páll Kolbeinsson hefur verið ráðinn þjálfari Íslandsmeistara KR í körfubolta en Böðvar Guðjónsson, formaður körfuknattleiksdeildar KR, staðfesti fregnirnar í samtali við Vísi í kvöld.

Þetta er í annað skiptið sem Páll þjálfar KR því eftir háskólanám í Bandaríkjunum sneri Páll heim til Íslands og lék fyrst með félaginu og varð Íslandsmeistari tímabilið 1989-1990, en svo tók svo við sem spilandi þjálfari og liðið varð bikarmeistari tímabilið 1990-1991 undir hans stjórn. Eftir það gerðist hann spilandi þjálfari Tindastóls.

Páll er því öllum hnútum kunnur hjá KR en hann hefur undanfarið einnig gengt starfi formanns meistaraflokksráðs hjá félaginu.

„Við erum mjög ánægðir með ráðninguna, sem og eflaust allir KR-ingar þar sem Palli er náttúrulega hokinn af reynslu bæði sem leikmaður og þjálfari og þekkir vel til leikmannahópsins vegna starfs hans fyrir félagið. Hann verður svo með góða menn sér til aðstoðar. Okkur fannst ekki ráðlagt að vera að binda okkur við erlenda þjálfara og þá í erlendri mynt og erum afar sáttir við að Palli hafi tekið verkefnið að sér," segir Böðvar sem kvað undirbúning fyrir næsta keppnistímabil vera þegar hafinn.

„Núna getum við einbeitt okkur að leikmannamálum að fullu. Við byrjuðum náttúrulega eins og vanalega að vinna vinnuna okkar varðandi þau mál um leið og síðasta tímabili lauk. Jón Arnór[Stefánsson] er náttúrulega úti og svo ætlar Jakob Örn [Sigurðarson] einnig að reyna fyrir sér erlendis. Þá er Helgi Már[Magnússon] í Svíþjóð ásamt unnustu sinni Guðrúnu Sóley knattspyrnukonu og ekki vitað hvort að þau komi heim í haust eða framlengi dvöl sína úti. Við eigum eftir að sjá betur hvernig landið liggur í þessum málum þegar æfingar hefjast að fullu aftur seinna í sumar" segir Böðvar.