Þýðir ekkert að tapa fyrir Justin

Stjarnan þarf nauðsynlega á sigri að halda í Iceland Express deildinni í kvöld þegar liðið tekur á móti sjóðheitu liði Snæfells.

Gestirnir úr Stykkishólmi hafa unnið átta af tíu útileikjum sínum í deildinni í vetur, hafa unnið níu af síðustu tíu leikjum sínum og fimm í röð.

"Við erum auðvitað fastir í þriðja sæti sama hvað gerist, en ég held að vilji enginn fara inn í úrslitakeppni með einhver töp á bakinu. Okkur hefur gengið vel að undanförnu og það var gaman að ná að vinna Grindavík um daginn. Það sýnir okkur að við getum unnið þessi efstu lið," sagði Hlynur Bæringsson, spilandi þjálfari Snæfells.

Stjörnuliðinu hefur ekki gengið vel síðan liðið varð Subwaybikarmeistari um daginn og hefur tapað þremur leikjum í röð.

"Stjarnan gæti lent í vandræðum ef liðið tapar tveimur síðustu leikjunum og það hjálpar þeim eflaust í kvöld að hafa mikið að spila fyrir. Það hefur áður gerst að lið sem hafa eitthvað til að spila um hafa unnið lið sem eru fyrir ofan þau í töflunni. En við getum ekki farið að tapa fyrir honum Justin (Shouse) félaga okkar. Það gengur ekki að láta hann vera að stríða sér - við stríðum honum meira en hann stríðir okkur, enda er af nægu að taka þegar maður er að stríða honum," sagði Hlynur glettinn um leikstjórnanda Stjörnunnar sem áður lék með Snæfelli.

Athygli vekur að Snæfelli hefur gengið betur á útivelli í vetur en á heimavelli. Liðið hefur unnið átta af tíu útileikjum sínum en hefur tapað fjórum leikjum á heimavelli.

"Þrjú af þessum töpum komu stuttu eftir hrunið í haust gegn Keflavík, Tindastól og ÍR og vorum frekar daprir þá. Það er samt gott að vita að við getum unnið á útivelli, því við þurfum væntanlega að geta það ef við ætlum okkur að gera eitthvað í úrslitakeppninni. Nema þá að við kaupum bara heimaleikina. Við verðum þá reyndar að vera eitthvað duglegri við að selja klósettpappírinn," sagði Hlynur í gamansömum tón.

Þrír leikir fara fram í Iceland Express deildinni í kvöld og hefjast þeir allir klukkan 19:15.

Njarðvík tekur á móti Breiðablik í Njarðvík, Stjarnan tekur á móti Snæfelli og ÍR sækir Þór heim á Akureyri.