Akureyringar þakka Haukum fyrir

Akureyri slapp við erfiða leiki gegn Selfyssingum í umspili um laust sæti í efstu deild á næsta ári. Það er þó ekki þeim sjálfum að þakka, en liðið hefur hrapað niður töfluna eftir að hafa trónað á toppnum í byrjun móts.

Það var sigur Hauka á Stjörnunni sem gerði þetta að verkum en Akureyri gerði 28-28 jafntefli við Fram í lokaumferð deildarinnar í dag.

"Það er gríðarlega létt yfir okkur," sagði brosmildur Akureyringur Jónatan Magnússon eftir leik. "Það er búið að vera baggi á okkur að klára þetta síðustu tvær vikur," sagði Jónatan.

"Ég vil taka fram að Haukar eru verðugir deildarmeistarar og ég lýsi yfir ánægju minni með að þeir kláruðu leikinn sinn í dag," sagði Jónatan jafnframt brosandi.

Hann bætti við að hann gæti ekki beðið eftir næsta vetri. Guðlaugur Axelsson og Heimir Örn Árnason ganga í raðir félagsins og koma þá á heimaslóðir. Þeir munu styrkja liðið verulega en fáir leikmenn fara frá því að öllum líkindum. Anton Rúnarsson fer aftur í Val þaðan sem hann var í láni.

Framarar hefðu með sigri mætt Val í úrslitakeppninni. Þeir mæta í staðinn besta liði landins, nýbökuðum deildarmeistörum. Það getur þó allt gerst í úrslitakeppninni eins og maður leiksins í dag, Rúnar Kárason, bendir á.

"Nú tekur alvaran við. Þetta eru allt hörku lið og það verður ekkert gefið," sagði Rúnar sem fannst liðið spila vel í dag.

"Við spiluðum helvíti vel. Vorum afslappaðir og góðir, en við fórum í uppnám undir lokin þegar þeir fóru að taka tvo og jafnvel þrjá menn úr umferð. Við vorum að skapa okkur færi en skotin voru bara léleg hjá okkur," sagði hann.