Magni á leið í Fjölni

Fjölnismenn eiga von á góðum liðsstyrk í körfuboltanum en Ingvaldur Magni Hafsteinsson mun að öllum líkindum ganga í raðir félagsins frá Snæfelli á næstu dögum.

„Það er afskaplega líklegt að ég sé að flytja í bæinn og má segja að það séu allar líkur á því að ég sé á leið í Fjölni," sagði Magni við Vísi.

Þar hittir hann fyrir fyrrum þjálfara sinn hjá Snæfelli, Bárð Eyþórsson.

„Ég er að vonast til þess að ganga frá mínum málum sem fyrst enda ekki þægilegt að hanga í lausu lofti," sagði Magni.

Hann hefur verið einn af lykilmönnunum í sterku liði Snæfells síðustu ár og því mikill missir fyrir Hólmara að Magni leiki ekki með þeim næsta vetur.