Gasol væntanlega með Lakers í nótt

Spánverjinn Pau Gasol verður væntanlega í byrjunarliði LA Lakers í kvöld þegar liðið tekur á móti Portland Trailblazers í NBA deildinni. Gasol hefur misst af síðustu níu leikjum liðsins vegna ökklameiðsla og hefur það tapað fjórum þeirra.

Gasol hefur skorað að meðaltali 19 stig og hirt 8.5 fráköst með Lakers síðan hann gekk í raðir liðsins frá Memphis í vetur hefur liðið unnið 15 leiki og tapað 4 með hann innanborðs en unnið 5 og tapað 4 síðan hann meiddist.

Phil Jackson þjálfari Lakers sagðist í samtali við LA Times reikna með því að Gasol færi í byrjunarliðið en fengi ekki margar mínútur í fyrstu leikjunum. Hann þyrfti væntanlega einar sex vikur til að fá sig góðan eftir að hann sneri sig illa á ökkla um daginn.

Miðherjinn Andrew Bynum er enn frá vegna meiðsla og æfir einn um þessar mundir. Hann mun ekki æfa með liðinu strax eftir hnémeiðsli sem hann hlaut í janúar.