Ég datt í það kvöldið áður

Fyrrum NBA leikmaðurinn Charles Barkley er þekktur fyrir að vera með munninn fyrir neðan nefið. Hann vinnur nú sem NBA sérfræðingur á TNT sjónvarpsstöðinni í Bandaríkjunum.

Í þættinum Inside the NBA á TNT í gærkvöldi var sérstakur hluti þáttarins tileinkaður endurkomu Allen Iverson til Philadelphia í fyrrakvöld, en þá spilaði Iverson sinn fyrsta leik í borginni með Denver eftir að hafa spilað í Philadelphia allan sinn feril.

Iverson skoraði 32 stig í leiknum en þurfti að sætta sig við tap gegn gömlu félögum sínum í 76ers. Hann fékk mjög góðar móttökur í Philadelphia og í þættinum í gær var Charles Barkley spurður út í fyrsta leik sinn í Philadelphia eftir að honum var skipt til Phoenix Suns í upphafi níunda áratugarins - ekki ósvipað og Iverson nú.

Barkley átti þá fínan leik en meðstjórnandi hans í sjónvarpsþættinum í gær veitti því athygli að hann hefði aðeins hirti 7 fráköst í umræddum leik fyrir um 15 árum síðan.

"Já, ég datt í það kvöldið áður," sagði Barkley án þess að depla auga. "Þetta var miklu betra fyrir Iverson því hann fékk að koma þarna og fara beint út á völlinn. Ég kom þarna daginn áður og allir tóku svo vel á móti mér. Ég þurfti að mæta í svo margar góðar veislur," sagði hinn litríki Barkley.