Trúnaðarbrestur á milli Þorbergs og HSÍ

Samningsnefnd HSÍ dreifði yfirlýsingu á blaðamannafundi sem haldinn var í hádeginu. Þar var Guðmundur Guðmundsson kynntur sem nýr landsliðsþjálfari en yfirlýsingin snýr að ummælum Þorbergs Aðalsteinssonar stjórnarmanns HSÍ.

Þorbergur gekk harðlega fram í gagnrýni sinni á þjálfurunum sem HSÍ hafði rætt við um að taka við starfi landsliðsþjálfara, þá Dag Sigurðsson, Aron Kristjánsson og Geir Sveinsson. 

Hér að neðan má sjá yfirlýsinguna:

Yfirlýsing samningsnefndar HSÍ

Þessir þjálfarar komu fram af heilindum og heiðarleika frá upphafi til enda.

Þeir drógu viðræður ekki á langinn, þvert á móti höfðu þeir skilning á því að gefa fljótt svar (tóku sér 1-4 daga í ákvörðun).

Þeir gáfu HSÍ ekki undir fótinn, heldur sóttist HSÍ eftir viðræðum og því var algjörlega eðlilegt að þeir hafi komið til þeirra viðræðna.

Ekki var um neinar kröfur að ræða frá þeim á neinn hátt, heldur almennar viðræður um starfsumhverfi og kjör.

Þeir sýndu á engan hátt dæmi um slæma viðskiptahætti, heldur þvert á móti hefur stjórnarmaður HSÍ brugðist trúnaði í þessu máli.

HSÍ harmar það að fjölmiðlar hafi tekið undir tilefnislausa gagnrýni Þorbergs að einhverju leiti enda átti sú gagnrýni engan veginn við rök að styðjast.

F.h. samninganefndar HSÍ

Guðmundur Ingvarsson