Ferguson: Benzema er frábær

Sir Alex Ferguson var ánægður með baráttu sinna manna í Manchester United í kvöld eftir að þeir lentu marki undir gegn Lyon en náðu að jafna og hafa góða stöðu fyrir síðari leikinn á Englandi.

"Mér fannst liðið sýna mikinn baráttuanda og ákveðni með því að jafna eftir að hafa fengið á sig mark upp úr engu. Þetta mark sýndi bara hversu góður þessi Benzema er í raun og veru - hann skoraði frábært mark upp úr engu," sagði Ferguson - en hrósaði sínum mönnum líka, sérstaklega Nani og varamanninum Carlos Tevez.

"Við vorum með tök á leiknum þegar við fengum markið á okkur og þetta varð okkur erfitt eftir að við lentum undir af því Lyon varðist vel. Við gerðum breytingar á liðinu og það breytti leiknum í framhaldinu. Nani var mikil ógn með hraða sínum og fyrirgjöfum og svo skoraði Tevez auðvitað þetta gríðarlega mikilvæga mark. Mér fannst við eiga skilið að ná þessum úrslitum," sagði Ferguson.

"Það er alltaf gott að ná svona úrslitum á útivelli í Evrópu, sérstaklega ef þú lendir undir og krafturinn í strákunum var frábær. Við leikum oft best þegar við erum að reyna að jafna. Þetta var ekki okkar besti leikur, en ágætur engu að síður. Nú höfum við gott veganesti í síðari leikinn á Old Trafford, þar sem andrúmsloftið er alltaf stórkostlegt í Meistaradeildinni."