Marion spilar líklega á sunnudaginn

Þeir Shawn Marion og Marcus Banks hafa enn ekki lokið læknisskoðun hjá liði Miami Heat í NBA deildinni eftir að þeim var skipt frá Phoenix til Flórída fyrir Shaquille O´Neal. Pat Riley reiknar með því að þeir klári læknisskoðun í kvöld og verði með liðinu þegar það mætir LA Lakers á sunnudaginn.

"Við eigum líklega eftir að verða sókndjarfari en áður þegar þeir koma inn í liðið. Shawn mun fá stórt hlutverk í liði okkar og það er mikilvægt að hann falli fljótt inn í það sem við erum að reyna að gera," sagði Pat Riley, þjálfari Miami.

Hann reiknar með því að það verði viðbrigði fyrir Marion að spila með Miami eftir að hafa spilað með Phoenix hraðalestinni undanfarin ár.

"Shawn er búinn að spila með liði sem spilar hratt og þar sem koma skot á sjö sekúndna fresti, svo honum á eftir að finnast við vera að spila í steypustígvélum," sagði Riley glettinn. "Við þurfum að reyna að koma honum inn í hlutina hérna og höfum restina af árinu til þess."

Shawn Marion skoraði 15,8 stig og hirti tæp 10 fráköst að meðaltali fyrir Phoenix í vetur, en hann fer nú frá einu besta liði deildarinnar til liðs sem hefur unnið aðeins einn leik síðan fyrir jól á síðasta ári.

NBA Bloggið á Vísi