Howard og Paul leikmenn mánaðarins

Dwight Howard hjá Orlando Magic og Chris Paul hjá New Orleans voru í nótt útnefndir leikmenn desembermánaðar í NBA deildinni.

Miðherjinn Howard skoraði 21,7 stig, hirti 16 fráköst, varði 2,9 skot og hitti úr 60% skota sinna í desember þar sem Orlando vann 8 leiki og tapaði 7. Howard var einnig valinn leikmaður mánaðarins í Austurdeildinni í nóvember.

Leikstjórnandinn Chris Paul var frábær í liði Hornets í desember þar sem hann skoraði 24,5 stig, gaf 10,4 stoðsendingar og stal 3 boltum að meðaltali þegar liðið vann 9 af 14 leikjum sínum. Hann var útnefndur leikmaður desembermánaðar í Vesturdeildinni.

Þá var Flip Saunders hjá Detroit valinn þjálfari mánaðarins í Austurdeildinni eftir að hafa stýrt liðinu til sigurs í 15 af 17 leikjum í mánuðinum og Nate McMillan leiddi Portland til 13 sigra í 15 leikjum í Vesturdeildinni, þar sem liðið vann m.a. 13 leiki í röð sem er lengsta og um leið óvæntasta sigurgangan í deildinni í vetur.

Yi Jianlian hjá Milwaukee var kjörinn nýliði mánaðarins í Austurdeildinni og Kevin Durant hjá Seattle í Vesturdeildinni.