Aron: Hafði góða tilfinningu

Aron Pálmarsson, átján ára leikmaður FH, var í dag valinn í íslenska A-landsliðið í fyrsta sinn. Hann sagði í samtali við Vísi hafa góða tilfinningu fyrir valinu.

„Það eru nokkrir leikmenn fjarverandi og því hafði ég góða tilfinningu fyrir þessu án þess þó að ég hafi beinlínis átt von á því að vera valinn," sagði Aron. „Ég er því auðvitað mjög sáttur."

„Þetta er auðvitað eitthvað sem ég hef stefnt að síðan ég var polli. Ég byrjaði ungur í yngri landsliðinum og ánægður með að þetta skuli rætast núna, meira að segja fyrr en maður átti von á."

FH-ingar eru í fimmta sæti deildarinnar með sex stig en topplið Akureyrar og Vals eru með átta stig. FH er nýliði í deildinni og hefur því farið vel af stað í haust.

„Þetta er búið að ganga vonum framar og ég er búinn að vera að spila vel. Ég er í toppformi þessa dagana eins og allt liðið. Við erum búnir að æfa vel í sumar og það er að borga sig nú."

FH er með samkomulag við þýska úrvalsdeildarfélagið Lemgo um forkaupsrétt á Aroni sem kveður á um að ef FH fær tilboð í Aron fær Lemgo tækifæri til að jafna það. Samkomulagið gildir til 2010 en Aron segir ljóst að hugurinn hans stefnir í atvinnumensku.

„Ég stefni á atvinnumennskuna síðar meir en mér finnst íslenska deildin henta mér ágætlega nú. Leikirnir eru ágætlega hraðir og skemtilegir. Það eru líka margir góðir leikmenn í deildinni, bæði ungir og efnilegir sem og leikmenn sem hafa komið heim úr atvinnumennsku. Flest liðin í deildinni eru líka mjög jöfn og leikirnir skemmtilegir."

Honum líst vel á verkefnin sem eru framundan með landsliðinu.

„Ég veit svo sem lítið um landslið Belgíu en Norðmenn eru sterkir. Ég vonast fyrst og fremst til þess að fá tækifærið og vonandi myndi ég þá nýta það. Svo stefni ég á að halda sæti mínu í hópnum þó það gæti verið erfitt. En ég mun halda mínu striki."