Fylgja þau eftir góðum sigrum?

Tveir leikir fara fram í N1-deild karla í kvöld þegar Fram tekur á móti Víkingi í Safamýrinni og HK-ingar sækja nýliða FH heim.

Fram og FH unnu bæði góða útisigra í fyrstu umferð á sama tíma og HK og Víkingur töpuðu heima.

Þetta verður fyrsti heimaleikur Viggós Sigurðssonar með Fram-liðið og það er við hæfi að uppeldisliðið hans, Víkingur, komi í heimsókn á þeim tímamótum.

Hið unga FH-lið er til alls líklegt í vetur sem þeir sýndu með fimm marka sigri á Akureyri í fyrsta leik og það verður gaman að sjá hvað þeir gera í fyrsta heimaleik sínum í efstu deild í rúm tvö ár.