Alvaran að byrja hjá Boston

17. desember 2007 13:25

Þríeykið stóra hjá Boston (Garnett, Pierce og Allen) hefur staðið vel undir væntingum í vetur NordicPhotos/GettyImages

Gamla stórveldið Boston Celtics hefur byrjað betur en nokkur þorði að vona í NBA deildarkeppninni í haust og hefur unnið 20 af fyrstu 22 leikjum sínum.

Þessi byrjun liðsins er sannarlega frábær og sú næst besta í sögu félagsins á þessum tímapunkti, en til eru menn sem segja þessa byrjun ekki gefa rétta mynd af styrk liðsins vegna þess að liðið hefur átt nokkuð þægilega leiki fyrsta einn og hálfa mánuðinn af leiktíðinni.

Boston hefur þannig aðeins spilað fjóra af þessum leikjum sínum við lið úr Vesturdeildinni, sem er mun sterkari en Austurdeildin. Boston hefur reyndar unnið alla fjóra leiki sína gegn andstæðingum úr vestrinu til þessa, en Vesturdeildin hefur að geyma 9 lið sem eru með 50% vinningshlutfall gegn aðeins 5.

Nú fer brátt í hönd erfiður kafli í töflunni hjá Boston þar sem m.a. er á dagskránni fyrsta keppnisferðin á vesturströndina.

Þar fæst væntanlega úr því skorið hvort Boston ætlar að blanda sér af alvöru í hóp þeirra liða sem hafa verið sterkust í deildinni síðustu ár. Liðið vann sannfærandi sigur á Toronto í nótt þrátt fyrir að vera án skotbakvarðarins Ray Allen og á miðvikudagskvöldið tekur liðið á móti fyrnasterku liði Detroit.

Næstu leikir Boston eru svo heimaleikir gegn Chicago og Orlando, en á annan í jólum heldur liðið á ferðalag um Vesturdeildina þar sem liðið mætir Sacramento, Seattle, Utah og LA Lakers í fjórum útileikjum á fimm dögum.

Eftir þá törn má ætla að hægt verði að sjá hvort Boston er raunverulega lið sem getur gert tilkall til þess að teljast eitt af liðunum sem eru sigurstranglegust í deildinni næsta vor, en því er ekki að neita að byrjun liðsins hefur verið einstaklega góð.