Uefa tekur Dida inn á teppi

Knattspyrnusamband Evrópu hefur nú tekið til rannsóknar meint agabrot markvarðarins Dida hjá AC Milan eftir að honum var skipt af velli í leik liðsins gegn Glasgow Celtic í síðustu viku.

Áhorfandi hljóp þá inn á völlinn og blakaði höndinni að markverðinum, sem henti sér í jörðina og gerði sér upp meiðsli. Hann var borinn af velli á börum og vöktu þessi leikrænu tilþrif hans mikla reiði Skota í kjölfarið.

Nokkrir leikmanna ítalska liðsins gagnrýndu líka tilþrif markvarðarins en sögðust þó standa við bakið á honum í málinu.

Mál Dida verður tekið fyrir á fimmtudaginn og í tilkynningu frá sambandinu segir að atvikið hafi verið rannsakað sérstaklega þar sem agareglur sambandsins segi skýrt að "leikmenn sem og aðrir verði að hegða sér í samræmi við reglur og venjur sem heyra til íþróttamennsku og heiðarleika." 

Þá verður mál skoska áhorfandans einnig tekið fyrir á fimmtudaginn þar sem Celtic gæti átt yfir höfði sér heimavallarbann eða háa sekt vegna málsins.