Mannræningjarnir höfðu leitað að fórnarlömbum um nokkurt skeið

Talibanahópurinn, sem hefur tuttugu og einn suður-kóreskan gísl á valdi sínu, hafði verið að leita að fórnarlömbum um nokkurt skeið, eða frá því að æðsti maður hópsins, Daro Kahn, var handtekinn af bandarískum hermönnum í Qarabagh-héraðinu í júní. Þetta kemur fram í viðtali við einn af æðstu mönnum hópsins sem tímaritið Newsweek birtir í dag.

Njósnarar á vegum talibanahópsins höfðu um nokkurt skeið leitað að fórnarlömbum á þjóðveginum á milli Kabul og Kandahar þegar þeir sáu hvíta rútu fulla af farþegum þann 19. júlí síðastliðinn. Í rútunni voru suður-kóresku hjálparstarfsmennirnir sem ferðuðust um án vopnaðra varða.

Hugmyndin með mannráninu var að reyna skipta á Suður-Kóreubúunum og 115 Talibönum sem hafa verið fangelsaðir, talan var síðan lækkuð í jöfn skipti og nú er farið fram á að átta talibönum verði sleppt, að því er fram kemur í Newsweek.

Talibanarnir hafa þegar drepið tvo af gíslunum. Sá frestur sem afgönsk stjórnvöld fengu til að sleppa talibönunum lausum í dag rann út án þess að frekari fréttir af manndrápi bærust.