Marta Lovísa í veikindafrí

Norska prinsessan Marta Lovísa hefur tekið sér tveggja vikna veikindafrí. Ekki hefur verið greint frá því hvað hrjáir hana. Prinsessan er 35 ára gömul og á tvö börn með eiginmanni sínum Ara Behn. Hún vakti heimsathygli í síðustu viku þegar hún upplýsti að hún gæti talað við dýr og engla.

Prinsessan hefur einnig opinberað að hún sé skyggn. Mágkona hennar, Mette-Marit krónprinsessa hefur skýrt frá því að Marta Lovísa hafi hjálpað sér í gegnum erfiðan nýrnakvilla með handayfirlagningum. Einkaritari prinsessunnar hefur sagt að hún muni ekki fjalla um veikindafrí sitt á opinberum vettvangi.