11 létust og 43 særðust í sprengjuárás í Islamabad

Að minnsta kosti 11 manns létust og fleiri en 43 særðust þegar sprengja sprakk á veitingastað ekki langt frá Rauðu moskunni í Islamabad í Pakistan í morgun. Samkvæmt fyrstu fregnum frá lögreglunni á staðnum var um sjálfsmorðsárás að ræða en rannsókn er þegar hafin á atvikinu.

Fyrr í morgun voru mikil mótmæli í og við moskuna sjálfa. Herskáir stúdentar sem styðja málstað talibana voru þá búnir að taka sér stöðu í moskunni eftir að hafa rekið út klerk sem ríkissstjórnin hafði skipað til þess að halda þar bænir. Lögregla þurfti að notast við táragas til þess að dreifa úr þeim.