Írakar reyna að setja niður deilur sínar

Fimm helstu stjórnmálaleiðtogar Íraks munu setjast saman á fund í þessari viku til þess að reyna að binda enda á það pólitíska neyðarástand sem hefur lamað þjóðina í marga mánuði. Þar munu hittast leiðtogar kúrda og sjía og súnní múslima. Þeir munu meðal annars ræða um skiptingu á tekjum af olíuframleiðslu og um yfirráðasvæði hvers hóps fyrir sig.

Bandaríkjamenn hafa mjög þrýst á Íraka að setja ný lög og gera ráðstafanir til þess að stöðva það sem er nánast borgarastyrjöld í landinu. Íraskir embættismenn sögðu í dag að leiðtoganir fimm geri sér fulla grein fyrir ástandinu og að það geti ekki gengið lengur.