Marbury ætlar að feta í fótspor David Beckham

Leikstjórnandinn Stephon Marbury hjá New York Knicks í NBA deildinni segist ætla að feta í fótspor David Beckham þegar samningur hans við New York rennur út eftir tvö ár. Hann segist vera búinn að ákveða að reyna þá fyrir sér á Ítalíu þar sem hann ætlar að setjast að með fjölskyldu sinni.

"Ég er ekki bara að hugsa um það að flytja til Ítalíu - ég ætla að gera það," sagði Marbury í samtali við New York Post. Marbury eyddi hluta af sumarfríi sínu á Ítalíu og fór þá m.a. til Rómar og Mílanó. "Konan féll fyrir Ítalíu og ég sé þetta fyrir mér sem svona Beckham-dæmi," sagði Marbury.

"Þegar samningur minn við New York rennur út verð ég búinn að spila 13 ár í NBA deildinni og flestir ná ekki að spila sjö ár. Það segir ýmislegt," sagði bakvörðurinn. Hann á ekki von á því að framlengja samning sinn frekar við New York eftir tvö ár þegar hann verður 32 ára gamall, en hann hefur átt við nokkur hnémeiðsli að stríða.