Nýtt myndband með Osama

Nýtt myndband Osama Bin Laden, leiðtoga Al-Kaída samtakanna, var birt á netinu í gær. Ekki er vitað hvenær myndbandið var útbúið en þar upphefur Bin Laden píslarvættisdauða og talar um Múhameð spámann.

Á föstudaginn ákvað öldungadeild Bandaríkjaþings að tvöfalda þá upphæð sem sett hefur verið til höfuðs Bin Laden og er hún nú rúmir þrír milljarðar íslenskra króna. Hryðjuverkasérfræðingar Bandaríkjamanna telja að Al-Kaída hafi náð þeim styrk, sem samtökin höfðu fyrir árásirnar í Bandaríkjunum 11. september 2001.