LeBron James orðinn faðir á ný

Stórstjarnan LeBron James hjá Cleveland Cavaliers í NBA deildinni hefur ekki haft mikla ástæðu til að fagna undanfarna daga þar sem lið hans er undir 3-0 í úrslitaeinvíginu við San Antonio Spurs. Hann gat þó leyft sér að brosa í nótt þegar kona hans ól honum sitt annað barn. Nafnið sem strákurinn fékk er ekki af ódýrari gerðinni frekar en nafn frumburðarins.

Fyrir áttu þau hjónin LeBron James yngri, en drengurinn sem fæddist í nótt hefur fengið nafnið Bryce Maximus James. Móður og barni heilsast vel að sögn talsmann Cavaliers, en hann var upphaflega settur á 17. júní. Cleveland og San Antonio mætast fjórða sinni í Cleveland í kvöld og þar getur San Antonio tryggt sér fjórða meistaratitilinn í sögu félagsins. Leikurinn hefst klukkan eitt eftir miðnætti og verður að sjálfssögðu sýndur beint á Sýn.