Taktu rútu druslan þín

Hinn 26 ára gamli Tom Sogheim fékk kaldar kveðjur þegar hann flaug með SAS flugfélaginu frá Osló til heimabæjarins Bodö síðastliðinn sunnudag. Tom var í götóttum gallabuxum, skeggjaður og með rasta-hárgreiðslu. Flugþjónn í SAS vélinni lét hann heyra að þetta væri sko ekki útlit sem þeir kærðu sig um.

Farþegum í næstu sætum fannst flugþjónninn ganga svo langt að þeir höfðu samband við norska blaðið Aftenposten, sem kannaði málið. SAS hefur nú beðið Tom afsökunar og leggur áherslu á að engar reglur séu um klæðaburð faraþega í vélum félagsins.

Tom er samt að hugsa um að taka lestina næst þegar hann fer að heiman. Flugþjónninn mun hafa gefið í skyn að ef menn klæddu sig eins og umrenningar ættu þeir að ferðast með járnbrautarlestum.