Falsað vegabréf sem nazistaforinginn Adolf Eichmann notaði til þess að flýja til Argentínu hefur fundist í Buenos Aires. Eichmann hafði yfirumsjón með helförinni gegn Gyðingum í síðari heimsstyrjöldinni. Hann lagði meðal annars til breytingar á gasklefunum til þess að þar væri hægt að myrða fleira fólk á skemmri tíma.
Þegar Eichmann kom til Argentínu eftir stríðið vann hann hjá Mercedes-Benz verksmiðjunum undir nafninu Ricardo Klement. Þar hafði ísraelska leyniþjónustan Mossad upp á honum. Honum var rænt og hann fluttur til Ísraels. Þar var hann dæmdur til dauða árið 1961 og tekinn af lífi árið eftir.
Vegarbéfið sem Eichmann notaði á flóttanum til Argentínu fannst fyrir tilviljun í dómsskjölum. Það var í góðu ásigkomulagi og hefur verið gefið helfararsafninu í Buenos Aires.
