Rashard Lewis á lausu í sumar

Framherjinn Rashard Lewis hjá Seattle Supersonics hefur ákveðið að nýta ákvæði í samningi sínum við félagið sem gerir honum kleift að vera laus allra mála í sumar. Lewis verður fyrir vikið af 25 milljónum dollara í laun fyrir síðustu tvö árin af samningi sínum, en er nokkuð öruggur með að fá góða launahækkun hjá nýju liði í sumar þar sem hann verður væntanlega eftirsóttasti samningslausi leikmaðurinn á markaðnum.

Lewis átti gott ár með Seattle í vetur þó liðinu gengi ekki sérlega vel, en hann skoraði yfir 22 stig að meðaltali í leik sem er það besta sem hann hefur gert á ferlinum. Hann hefur verið hjá Seattle öll níu ár sín á ferlinum. Seattle getur raunar boðið Lewis besta samninginn af öllum liðum í deildinni eða sex ára samning, en óvíst er hvort hann muni taka því og hefur hann óskað eftir því að ganga í raðir sterkara liðs.

Hann ætlar engu að síður að gefa Seattle möguleika á að bjóða sér góðan samning fyrst, áður en hann leitar annað. Seattle datt í lukkupottinn í nýliðalotteríinu um síðustu helgi þar sem félagið tryggði sér annan valrétt í sterku nýliðavalinu í sumar og þar mun annað hvort Kevin Durant eða Greg Oden standa liðinu til boða. Báðir leikmenn eru taldir mjög sterkir og tilbúnir að gera góða hluti strax, svo heilladísirnar virðast vera að snúast Seattle á band eftir mögur ár undanfarið. Félagið var fyrir nokkru selt til fjárfesta í Oklahoma City og talið var líklegt að næsta tímabil yrði það síðasta hjá félaginu í Seattle-borg.

Í kjölfar þess að liðið fékk annan valréttinn í nýliðavalinu á dögunum hafa traustir stuðningsmenn liðsins þó heldur betur tekið við sér og seljast miðar á leiki liðsins á næsta tímabili betur en síðustu ár. Það er því loksins komin bjartsýni í stuðningsmenn þessa fornfræga félags, sem síðast komst í lokaúrslit NBA árið 1996.